د هند حکومت یو ځل بیا له افغانستان او خلکو سره پر خپلو “اوږدمهاله اړیکو” ټینګار کړی او ویلي یې دي چې نوی ډیلی هڅه کوي له افغانستان سره په مختلفو برخو کې همکاري پراخه کړي.
د هند د بهرنیو چارو وزارت ویاند رندهیر جیسوال وویل چې په تیر کال کې او په ځانګړي ډول په وروستیو میاشتو کې، هند ته د افغان چارواکو سفرونه او لیدنې زیاتې شوې دي، او دې تعاملاتو د پراختیا، سوداګرۍ او سیمه ییزې اړیکې په برخو کې د همکارۍ په پیاوړتیا کې مرسته کړې ده.
جیسوال زیاته کړه: “موږ له افغانستان او د افغانستان له خلکو سره اوږدمهاله اړیکې لرو، او موږ هیله لرو چې دا اړیکې نورې هم پیاوړې کړو.”
د راپورونو له مخې، ټاکل شوې ده چې په نوي ډیلي کې د افغانستان سفارت واک ته د اسلامي امارت د راستنیدو د پنځمې کلیزې په مناسبت مراسم ترسره کړي؛ خو د هند د بهرنیو چارو وزارت په مراسمو کې د دغه هیواد د کوم چارواکي شتون تایید نه دی کړی.
هند ویلي چې له افغانستان سره به د پراختیا، سوداګرۍ او سیمه ییزې اړیکې په برخو کې همکارۍ ته دوام ورکړي؛ په تېر کال کې د اسلامي امارت یو شمېر چارواکو هم هند ته سفرونه کړي دي.
#افغانستان #هند #دوه اړخیزې_اړیکې #سوداګري #سیمه ییزه_همکاري #سفیر_ټی وی
