د اسرائیلو د ولسمشر اسحاق هرتزوګ د سلا مشورو په دوام، د «یشار» ګوند مشر ګادي ایزنکوټ د حکومت جوړولو د مأموریت ترلاسه کولو لپاره د کنست (پارلمان) د ۶۷ غړو ملاتړ ترلاسه کړی؛ په داسې حال کې چې ۴۶ استازو د بنیامین نتانیاهو ملاتړ کړی دی.
عربي ګوندونو، د عربي ګډ لېست او رعام ګوند په ګډون، د ایزنکوټ ملاتړ کړی، څو واک ته د نتانیاهو د بېرته ستنېدو مخه ونیسي؛ خو نتانیاهو د عربي ګوندونو له لوري د ایزنکوټ پر ملاتړ نیوکه کړې ده.
د ټاکنو د پایلو له مخې، د نتانیاهو په مشرۍ لیکود ګوند د کنست ۲۷ څوکۍ، یشار ګوند ۲۱ څوکۍ او د نفتالي بنت په مشرۍ «بییحد» ګوند ۱۲ څوکۍ ګټلې دي. د نتانیاهو بلاک ۵۳ او د مخالفانو بلاک ۴۸ څوکۍ لري، چې عربي ګوندونه هم په ټولیزه توګه ۱۹ څوکۍ په واک کې لري.
ایزنکوټ به د حکومت جوړولو د مأموریت د ترلاسه کولو په صورت کې د کابینې د جوړولو لپاره ۲۸ ورځې وخت ولري، چې دغه موده د ۱۴ نورو ورځو لپاره هم غځېدای شي؛ خو د نوموړي د نوماندۍ لپاره د پارلمان د غړو ملاتړ په دې معنا نه دی، چې هغوی به په راتلونکي حکومت کې هم ګډون وکړي.
