د عامې روغتیا وزارت د درملو او روغتیايي محصولاتو د تنظیم عمومي رییس نعیم الله ایوبي، بنګله دیش ته د خپل سفر په جریان کې د بنګله دیش د درملو د تنظیم ادارې له رییس محمد عالمګیر حسین سره ولیدل.
په دې غونډه کې، دواړو خواوو د درملو او روغتیايي محصولاتو د سکتور د پراختیا، او همدارنګه په افغانستان کې د درملو د راجستر کولو د پروسې د ښه والي او اسانتیا په اړه بحث وکړ.
د عامې روغتیا وزارت د یوې مطبوعاتي اعلامیې له مخې، دواړو خواوو د روغتیا په سکتور کې د تخنیکي همکارۍ، د تجربو تبادلې او د دوه اړخیزو اړیکو د پیاوړتیا پر اهمیت ټینګار وکړ.
دا بحثونه د روغتیا خدماتو د کیفیت د ښه والي او په افغانستان کې د درملو بازار د ښه تنظیم لپاره ترسره شول.
