امیر خان متقي د هغو هېوادونو له استازو سره وکتل چې د غېږې نیولو دودیز فیستیوال کې برخه اخلي

د افغانستان د اسلامي امارت د بهرنیو چارو وزیر مولوي امیر خان متقي په کابل کې د غېږې نیولو نړیوال فیستیوال کې د ګډون کوونکو هېوادونو له استازو سره ولیدل.

په دې غونډه کې، هغه د سیمې له هېوادونو سره د افغانستان پر کلتوري اړیکو او تاریخي اړیکو ټینګار وکړ او ویې ویل چې د سپورتي ډیپلوماسۍ له لارې له نړۍ سره د افغانستان د اړیکو د لا پراخولو هڅې روانې دي.

د بهرنیو چارو وزیر همدارنګه زیاته کړه چې د لوبغاړو او نورو برخو لپاره د ویزې د ورکولو د پروسې د اسانتیا لپاره هڅې روانې دي، او د اسلامي امارت له واک ته رسیدو وروسته، د دودیزو سپورتونو او لوبو په برخه کې د پام وړ پرمختګ شوی دی.

د ګډون کوونکو هېوادونو د سپورت استازو هم د افغانستان د کوربه توب او مدیریت ستاینه وکړه او د ګډې همکارۍ پر دوام یې ټینګار وکړ.