د بشري حقونو نړیوال بنسټ (IHRF) د کابل په ختیځ کې د نشه يي توکو د روږدو د درملنې په مرکز باندې د پاکستان د رژیم هوايي برید په کلکه وغانده، او دا یې د بشري حقونو د اصولو او نړیوالو قوانینو څخه ښکاره سرغړونه وبلله؛ دغه بنسټ د خپلواکې نړیوالې پلټنې، د مجرمینو د حساب ورکولو او د روغتیايي تاسیساتو د سمدستي ساتنې غوښتنه وکړه.
په افغانستان کې د بشري حقونو په اړه د ملګرو ملتونو ځانګړي راپور ورکوونکي، ریچارډ بینټ، د ملکي تلفاتو د راپورونو په اړه ژوره اندیښنه څرګنده کړه او له ټولو خواوو یې وغوښتل چې له زغم څخه کار واخلي او نړیوال قانون ته درناوی وکړي، په ځانګړې توګه د ملکي وګړو او روغتیايي تاسیساتو ساتنه.
د پښتون ژغورنې غورځنګ مشر منظور پشتین، دا برید “د پنجابي استعمار جرم” وباله او ویې ویل چې غورځنګ د افغانانو سره ولاړ دی او پلان لري چې د دوی غږ نړۍ ته واوري؛ هغه له پاکستاني عالمانو وغوښتل چې په کابل کې د ناروغانو د جسدونو څخه شرم وکړي.
د افغانستان لپاره د امریکا د سولې پخواني استازي زلمي خلیلزاد د شاوخوا ۴۰۰ ملکي وګړو وژنه د پاکستان د ظالمانه بریدونو پایله وبلله او له نړیوالې ټولنې یې وغوښتل چې دا جرم وغندي او قربانیانو ته بشري مرستې ورسوي؛ هغه همدارنګه له پاکستاني خلکو وغوښتل چې د پوځي رژیم د مشرتابه د غیر انساني پریکړو څخه ناراضه وي.
د افغانستان د کرکټ ستوری راشد خان د روغتون په نښه کول یو جنګي جرم وباله او ویې ویل چې د روژې په میاشت کې داسې کړنې دردناک او ټکان ورکوونکې وې؛ هغه له ملګرو ملتونو او د بشري حقونو له سازمانونو وغوښتل چې د دې تراژیدۍ په جدي توګه پلټنه وکړي او عاملین یې حساب ورکړي.
