یمن د سعودي عربستان په خاوره کې د شپږو پوځي عملیاتو خبر ورکړ؛ د تېلو تاسیسات او ډګرونه په نښه شوي دي
د یمن د وسلهوالو ځواکونو ویاند یحیی سریع اعلان کړی چې دغو ځواکونو د سعودي عربستان په خاوره کې د هدفونو پر وړاندې شپږ پوځي عملیات ترسره کړي دي.
د هغه په وینا، په لومړي عملیات کې د رأس تنوره د تېلو چاڼځای د یوه بالستیک توغندي په وسیله په نښه شوی او توغندی پر خپل هدف لګېدلی دی. په دویم عملیات کې هم د بقیق په سیمه کې د ارامکو شرکت تاسیسات د یوه بالستیک توغندي په وسیله په نښه شوي دي.
سریع زیاته کړې چې په ریاض کې د ملک خالد نړیوال هوايي ډګر هم تر برید لاندې راغلی دی. په څلورم عملیات کې د دمام د ملک فهد نړیوال هوايي ډګر د یوې بېپیلوټه الوتکې په وسیله په نښه شوی دی. د هغه په وینا، دغو بریدونو په یادو هوايي ډګرونو کې د الوتنو د درېدلو لامل شوي دي.
د یمن د وسلهوالو ځواکونو ویاند ویلي چې د رابغ د تېلو چاڼځای هم په پنځم عملیات کې د یوه بالستیک توغندي په وسیله په نښه شوی دی. په شپږم عملیات کې د نجران په سیمه کې د سعودي ځواکونو د قوماندانۍ پر مرکز برید شوی چې د هغه په وینا، په پایله کې یې یو شمېر سعودي پوځیان او افسران وژل شوي او ټپیان شوي دي.
د یمن وسلهوالو ځواکونو ټینګار کړی چې د سعودي عربستان په خاوره کې به خپلو پوځي عملیاتو ته دوام ورکړي او د «محاصرې په بدل کې محاصره» او «د تاوتریخوالي د زیاتوالي په بدل کې د تاوتریخوالي زیاتوالی» پر معادلو به ټینګ پاتې شي؛ دغو ځواکونو د خپلو عملیاتو د پای ته رسولو لپاره د بریدونو درول او پر یمن د محاصرې پای ته رسول شرط بللی دی.
