امریکایي رسنیو راپور ورکړی، چې د امریکا د اوریګن ایالت د بېنډ ښار په «سیلور ریل» لومړني ښوونځي کې د ډزو له امله د درېیو ماشومانو او دوو لویانو په ګډون پنځه تنه وژل شوي دي؛ بریدګر هم د وژل شویو په ډله کې دی.
د خپرو شویو راپورونو له مخې، د سپټمبر له ۱۹مې څخه د اکتوبر تر ۱۵مې پورې، د امریکا په ښوونځیو، د پوهنتونونو په انګړونو او یا د هغوی په شاوخوا کې د ډزو لږ تر لږه اته پېښې ثبت شوې دي؛ په دغو پېښو کې یو شمېر کسان وژل شوي یا ټپیان شوي دي.
راپورونه ښيي، چې یوازې د اکتوبر په دویمه، د امریکا په درېیو ایالتونو کې د منځنیو ښوونځیو د موټرو تمځایونو کې د ډزو په درېیو جلا پېښو کې پنځه تنه ټپیان شوي دي.
د «Education Week» وېبپاڼې د معلوماتو له مخې، له ۲۰۱۸ کال څخه د ۲۰۲۵ کال تر پایه، د امریکا په ښوونځیو کې د ډزو په پېښو کې ۱۴۷ تنه وژل شوي او ۴۲۰ نور ټپیان شوي دي؛ په وژل شویو کې ۱۰۶ تنه ماشومان وو.
