د چین دولتي رسنیو راپور ورکړی چې په ګانسو ولایت کې د ځمکې ښویدنې له امله ۱۶ کسان لا هم د خاورو لاندې بند پاتې دي؛ تر اوسه پورې د ۳۳ بند پاتې شویو کسانو څخه ۱۷ کسان ژغورل شوي او د لټون عملیات روان دي.
په ورته وخت کې، په هوبي ولایت کې سختو طوفانونو اته کسان وژلي، یو یې ورک شوی او لږترلږه ۲۷۵ نور یې ټپیان کړي دي.
د چین ولسمشر شي جین پینګ د ټپیانو د ژغورنې لپاره د ټولو سرچینو د راټولولو امر کړی دی. د هوا پېژندنې چارواکو دا هم اعلان کړی چې په ځینو سیمو کې د باد سرعت په ساعت کې ۱۴۹ کیلومترو ته رسیدلی دی.
د چین د ملي هوا پېژندنې مرکز د دوامداره درنو بارانونو، د سیلابونو، د ځمکې ښویدنې او طوفانونو د خطر خبرداری ورکړی دی، او اعلان یې کړی چې سوپر ټایفون “باوی” هم د تایوان په لور د ۲۹۰ کیلومترو په سرعت سره روان دی.
#چین #د ځمکې ښویدنې #طوفان #ګانسو #هوبي #طبیعي ناورینونه
