ملګرو ملتونو اعلان کړی چې په ختیځ افغانستان کې د سختو بارانونو او سیلابونو له امله له ۴۰ څخه ډیر کسان وژل شوي، لسګونه ټپیان شوي او څو نور ورک دي.
د ملګرو ملتونو د سرمنشي ویاند سټیفن دوجاریک وویل چې سیلابونو د استوګنې کورونو، دولتي ودانیو او سوداګریزو مرکزونو ته پراخ زیانونه اړولي دي، او د لټون او ژغورنې عملیات لاهم روان دي.
د هغه په وینا، ملګري ملتونه او بشري شریکان د زیانونو ارزونه کوي او بیړنۍ مرستې چمتو کوي، او سرپناه، خواړه، روغتیایی خدمات، لومړني اړتیاوې او رواني ملاتړ د اغیزمنو خلکو ترټولو مهمې اړتیاوې دي.
دوجاریک د ګرځنده روغتیایی ټیمونو لیږلو، اغیزمنو سیمو ته د طبي تجهیزاتو او خوړو لیږدولو اعلان هم وکړ، او زیاته یې کړه چې د سړکونو ویجاړتیا او جغرافیایي ستونزو د مرستې پروسه ننګونکې کړې ده.
#افغانستان #سیلابونه #ملګري ملتونه #بشري مرسته #نورستان
