د افغانستان د بهرنیو چارو وزارت په یوه اعلامیه کې اعلان وکړ چې په کابل کې یې د پاکستان شارژدافیر احضار کړ او د افغانستان د هوایي حریم د سرغړونې او د ملکي وګړو د کورونو د بمبارۍ په اړه یې هغه ته خپل سخت او کلک اعتراض وړاندې کړ.
د اعلامیې له مخې، د پاکستان پوځ تیره شپه یو ځل بیا د افغانستان له هوایي حریم څخه سرغړونه وکړه او د خوست، پکتیکا او کونړ ولایتونو ځینې سیمې یې په هوايي بریدونو سره په نښه کړې.
د افغانستان د بهرنیو چارو وزارت ویلي چې د دې بریدونو په پایله کې ۱۱ ماشومان، یوه ښځه او یو سپین ږیری سړی وژل شوي او ۱۴ نور ملکي وګړي چې ښځې او ماشومان هم پکې شامل دي ټپیان شوي دي.
په اعلامیه کې ویل شوي چې اسلامي امارت دا عمل د نړیوالو اصولو او قوانینو ښکاره سرغړونه ګڼي او په کلکه یې غندي.
د بهرنیو چارو وزارت هم ټینګار کړی چې د هیواد د ځمکنۍ بشپړتیا دفاع او د خپلو اتباعو د امنیت ډاډمن کول خپل مسؤلیت ګڼي او له پاکستان څخه یې غوښتنه کړې چې د پراکسي پالیسیو د دوام پر ځای د خپلو داخلي ستونزو لپاره بنسټیز حل لارې ولټوي.
وزارت زیاته کړه: “څنګه ممکنه ده چې په یوه هیواد کې د ماشومانو او ښځو وژنه د بل هیواد د امنیت ډاډمن کول وي؟”
د افغانستان د بهرنیو چارو وزارت خبرداری ورکړی چې د پاکستان پوځ به د داسې تکراري او پاروونکو کړنو د ټولو پایلو مسؤل وي.
#افغانستان #پاکستان #خوست #پکتیکا #کنړ #د_افغانستان_د_بهرنیو_چارو_وزارت #سیمه ایز_پرمختګونه
