د فواید عامې وزارت اعلان کړی چې تیره اونۍ، د ۱۴۰۵ کال د غوایي له ۱۱ څخه تر ۱۷ پورې، په ټولیزه توګه ۲۳۵،۳۶۲ میټریک ټنه توکي د هیواد د ریل پټلۍ له لارې لیږدول شوي دي.
د وزارت د معلوماتو پر بنسټ، ۱۶۰،۰۶۳ ټنه د حیرتان بندر، ۱۸،۶۹۵ ټنه د آقینې بندر، ۲۳،۶۱۶ ټنه د تورغونډۍ بندر، او ۳۲،۹۸۸ ټنه د خواف-هرات ریل پټلۍ له لارې لیږدول شوي دي.
په دې لیږدونو کې پټرولیم، غیر پټرولیم او نور سوداګریز توکي شامل وو، او په ورته موده کې، ۱،۱۹۲ ټنه توکي هم صادر شوي، چې ډیری یې وچې میوې، منرالونه او د انارو جوس وو.
د فواید عامې وزارت د ریل پټلۍ له لارې د لیږد زیاتوالی د دندو د ودې، د ملي عوایدو د زیاتوالي او د هیواد د اقتصادي ثبات د پیاوړتیا لپاره یو شرط بللی دی.
