د امریکا د بهرنیو چارو وزیر مارکو روبیو د امیر امیري د خوشې کېدو او راستنېدو اعلان وکړ، چې یو امریکایی تبعه دی چې په افغانستان کې بندي دی.
روبیو د امیري د خوشې کېدو په برخه کې د قطر د منځګړیتوب ستاینه وکړه او دا همکاري یې د حساسو ډیپلوماتیکو مسلو د حل لپاره د نړیوالو هڅو د اړتیا یوه بیلګه وګڼله.
هغه په خپل ایکس مخ کې ولیکل: “نن موږ د امیر امیري د راستنېدو هرکلی کوو؛ موږ به تر هغه وخته پورې ارام ونه کړو چې ټول امریکایي اتباع چې په غلطه توګه په بهر کې توقیف شوي وو بیرته خپل هیواد ته راستانه نشي.”
د یادونې وړ ده چې د امیري نیول په وروستیو میاشتو کې د واشنګټن او اسلامي امارت ترمنځ کړکیچ رامینځته کړی و.
سیاسي شنونکي د هغه خوشې کېدل د دواړو خواوو ترمنځ د کړکیچونو د کمولو او اړیکو د ښه کولو لپاره یو مهم ګام ګڼي.
مخکې له دې، د افغانستان د سولې لپاره د امریکا پخواني استازي زلمي خلیلزاد هم د امیري خوشې کېدل تایید کړل او دا یې “مثبت ګام” وباله.
هغه هیله څرګنده کړه چې د نورو توقیف شویو امریکایی اتباعو پورې اړوند مسلې به هم په بشپړ او شفاف ډول حل شي.
