د لبنان د حزب الله عمومي منشي نعیم قاسم په یوه بیان کې ټینګار وکړ چې اسراییلي رژیم به هیڅکله ونشي کولی خپل پراختیا غوښتونکي اهداف ترلاسه کړي، په شمول د “لوی اسراییل” جوړول او د سیمې د هیوادونو ویش.
هغه لبنان د اسراییلو، په ختیځو پولو کې د تکفیري ډلو او متحده ایالاتو له دریو اصلي ګواښونو سره مخ وګاڼه، او د حزب الله بې وسلې کول یې د اسراییلو د پراختیا غوښتونکي پلان یوه برخه وبلله.
د لبنان د ځمکو په آزادولو او بیروت ته د اسراییلو د نفوذ په مخنیوي کې د حزب الله رول ته په اشارې سره، قاسم وویل چې دې غورځنګ په خپل ځواک سره لبنان ته ثبات راوستی او په خپله خاوره کې یې د اسراییلو د میشت ځایونو مخه نیولې ده.
هغه زیاته کړه چې اسراییلو د اوربند تړون ۳۸۰۰ ځله سرغړونه کړې، خو حزب الله په خپل مقاومت سره اسراییل اړ ایستلی چې دا تړون ومني او خپل ځواکونه وباسي.
هغه ټینګار وکړ چې حزب الله د اسراییلو د هر ډول تیري په وړاندې د ځان دفاع ته چمتو دی او تر هغه چې دا غورځنګ شتون ولري، اسراییل به خپلو اهدافو ته ونه رسیږي.
