اردوغان: د غزې د اوربند تړون نه عملي کېږي؛ په لوېدیځه غاړه کې د مېشتځایونو د اوسېدونکو بریدونه زیات شوي دي
د ترکیې ولسمشر رجب طیب اردوغان د جمعې په ورځ (د ۲۰۲۶ کال د نومبر ۶مه) په استانبول کې د TRT نړیوال فورم د لسمې غونډې د پرانیستې په مراسمو کې اسرائیل تورن کړ، چې په غزه کې د اوربند تړون نه عملي کوي. نوموړي په اشغال شوې لوېدیځه غاړه کې د فلسطینیانو پر وړاندې د اسرائیلي مېشتځایونو د اوسېدونکو د بریدونو د زیاتېدو په اړه هم خبرداری ورکړ.
د انادولو خبري آژانس د راپور له مخې، اردوغان وویل، چې د غزې د سولې تړون، چې ترکیې یې په منځګړیتوب کې هم ونډه لرله، په سمه توګه نه عملي کېږي او د فلسطینیانو د خپلو سیمو پرېښودو ته د اړ ایستلو په موخه د مېشتځایونو د اوسېدونکو بریدونه هره ورځ پراخېږي.
د ترکیې ولسمشر د سولې، امنیت او ثبات د ساتنې پر نړیوالو بنسټونو هم نیوکه وکړه او ویې ویل، چې دغه بنسټونه په غزه کې د روان وضعیت پر وړاندې یوازې ننداره کوي او اندېښنه څرګندوي، خو د فلسطینیانو د حقونو د سرغړونو د مخنیوي لپاره اغېزمن ګامونه نه پورته کوي.
اردوغان ټینګار وکړ چې نړیواله ټولنه باید د دې وضعیت د پای ته رسولو او د یوه عادلانه نړیوال نظام د رامنځته کولو لپاره اقدام وکړي.
