د اسراییلو د ټاکنو مرکزي کمېسیون اعلان کړی چې د دغه رژیم د پارلماني ټاکنو د رایو شمېر پای ته رسېدلی او د بنیامین نتانیاهو په مشرۍ ایتلاف په ۱۲۰ کسیز کنېسټ کې د ۵۳ څوکیو په ترلاسه کولو سره ونه توانېد چې پارلماني اکثریت خپل کړي.
د وروستیو پایلو له مخې، د ګادي آیزنکوټ په مشرۍ مخالف ایتلاف ۴۸ څوکۍ او عربي ګوندونو په ټولیز ډول ۱۹ څوکۍ ترلاسه کړې دي؛ د اکثریت ترلاسه کولو او کابینې جوړولو لپاره لږ تر لږه د ۶۱ څوکیو ترلاسه کول اړین دي.
دغو پایلو د نتانیاهو ایتلاف له څوکیو سره د پام وړ کمښت سره مخ کړی او د حکومت جوړولو راتلونکی یې په سیاسي خبرو اترو او د نورو ډلو د ملاتړ په ترلاسه کولو پورې تړلی دی. عربي ګوندونه ښايي د ۱۹ څوکیو په ترلاسه کولو سره د کابینې جوړولو په معادلو کې پرېکنده رول ولوبوي.
نتانیاهو به د نوي حکومت تر جوړېدو او د هغه د کار تر پیل پورې د لومړي وزیر په توګه خپلې دندې ته دوام ورکړي؛ ټاکل شوې چې د ټاکنو پایلې له وروستیو ارزونو وروسته د دغه رژیم ولسمشر ته وړاندې شي.
