د روسیې د بهرنیو چارو وزارت مرستیال سرګي ریابکوف، د تاس خبري اژانس په حواله، ویلي چې له روسیې سره د بریتانیا له لوري د کړکېچ د زیاتولو د پالیسۍ دوام کولای شي د دغه هېواد امنیت له جدي ګواښ سره مخ کړي.
ریابکوف ادعا کړې چې لندن د اوکراین له حکومت څخه د خپل ملاتړ په پراخولو سره له دې خطر سره مخ دی چې له جګړې څخه د بالفعل ښکېل لوري پر ځای د شخړې پر حقوقي لوري بدل شي. نوموړي ویلي چې روسیې د دې پالیسۍ د دوام د پایلو په اړه بریتانوي چارواکو ته خبرداری ورکړی دی.
د هغه په وینا، په دې اړه د مسکو دریځ په هغه یادښت کې تشریح شوی چې په دې وروستیو کې په روسیه کې د بریتانیا سفارت سرپرست شارژدافیر ته سپارل شوی دی.
د روسیې د بهرنیو چارو وزارت مرستیال هم ویلي چې د روسیې د پوځي عملیاتو دوام د اوکراین د شخړې د اوږدمهاله حل د ترلاسه کولو پر وړاندې خنډ نه دی. هغه د خبرو اترو لپاره د مسکو پر چمتووالي ټینګار کړی، خو ویلي یې دي چې د روسیې له نظره اوربند کولای شي اوکرایني ځواکونو ته د بیا منظمېدو او ځواکونو د تازه کولو فرصت برابر کړي.
