په قطر کې د افغانستان د اسلامي امارت د سفارت سرپرست سهیل شاهین ویلي دي چې اسلامي امارت د متوازن سیاست پر بنسټ له ټولو هیوادونو سره اړیکې پراخول غواړي او قطر د افغانستان په بهرني سیاست کې ځانګړی ځای لري.
د هغه په وینا، په افغانستان کې د بهرنیو ځواکونو د شتون پر مهال، قطر د اسلامي امارت د سیاسي دفتر کوربه توب او د سیاسي خبرو اترو د اسانتیا په برابرولو سره د بهرنیو نظامي شتون د پای ته رسولو په پروسه کې مهم رول لوبولی دی.
یو شمیر سیاسي کارپوهانو هم د سیاسي او اقتصادي همکاریو د پراختیا لپاره د کابل او دوحې ترمنځ د نږدې اړیکو دوام مهم ګڼلی دی او ویلي یې دي چې قطر کولی شي د افغانستان، فارس خلیج هیوادونو او لویدیځې نړۍ ترمنځ د پل رول ولوبوي.
د اسلامي امارت چارواکو مخکې ټینګار کړی و چې د افغانستان بهرنۍ پالیسي د سیمې او نړۍ له هیوادونو سره د مثبت او متوازن تعامل پر بنسټ ولاړه ده.
