د افغانستان د اسلامي امارت ویاند مولوي ذبیح الله مجاهد د روسیې د سرچینو لخوا د افغانستان په خاوره کې د نړیوالو ترهګرو سازمانونو د جنګیالیو د شتون په اړه وروستۍ ادعا په کلکه رد کړه، او دا راپورونه یې دروغ او تکراري وبلل.
ښاغلي مجاهد ټینګار وکړ: “موږ خواشیني یو چې دا ډول ادعاوې په روسیه کې د سرچینو لخوا کیږي؛ هغه ادعاوې چې په تیرو وختونو کې، حتی د متحده ایالاتو د اشغال له وخت راهیسې تکرار شوي، او موږ یې په عمومي توګه ردوو.”
هغه زیاته کړه چې افغانستان په یوه باثباته امنیتي وضعیت کې دی، د هیواد ټوله جغرافیه د یو واحد حاکمیت لاندې اداره کیږي، او هیڅ بهرنۍ ډله پدې خاوره کې فعاله نه ده.
د اسلامي امارت ویاند په روسي چارواکو غږ وکړ چې په افغانستان کې واقعیتونه په سمه توګه درک کړي او خپل راپورونه د هیواد د عیني او اوسني شرایطو پر بنسټ تازه کړي.
اسلامي امارت په وار وار ټینګار کړی چې اجازه به ورنکړي چې د افغانستان خاوره د هیڅ هیواد پر ضد وکارول شي او په هیواد کې عمومي امنیت ډاډمن شي.
