د ایران د بهرنیو چارو وزارت د لارک ټاپو په ځینو برخو باندې د امریکا د پوځي برید په غندلو سره یوه اعلامیه خپره کړې او ویلي یې دي چې دا برید د ایران د ملي حاکمیت او ځمکنۍ بشپړتیا په سرغړونه کې شوی او یو شمیر ایراني مدافعین او اتباع پکې وژل شوي او ټپیان شوي دي.
په اعلامیه کې ویل شوي چې د دې برید په ځواب کې او د “قانوني دفاع د ذاتي حق” په چوکاټ کې، د ایران وسله والو ځواکونو په اردن کې د امریکا پوځي اډې په نښه کړې دي، کوم چې تهران په ایران باندې د برید اصلي او ملاتړی ګڼي.
د ایران د بهرنیو چارو وزارت په لارک باندې د امریکا برید د ملګرو ملتونو د منشور د دوهمې مادې، څلورمې فقرې سرغړونه بللې او د امنیت شورا او د سازمان له عمومي منشي یې غوښتي چې د نړیوالې سولې او امنیت د ساتلو لپاره اقدام وکړي او یرغلګر مسؤل وګڼي.
تهران دا هم ادعا کړې چې د امریکا او اسراییلي رژیم اقدامات د فارس خلیج او هرمز تنګي کې د کښتیو د ناامنۍ اصلي لامل دی، او ټینګار یې کړی چې د ایران وسله وال ځواکونه به د هر ډول پوځي تیري په وړاندې په قاطع او متناسب ډول ځواب ووایی.
د ایران د بهرنیو چارو وزارت د امریکا د وروستیو اقداماتو د پایلو او د هیواد په وړاندې د سمندري محاصرې او اقتصادي جګړې د دوام مسؤلیت په واشنګټن او هغو ګوندونو اچولی چې په دې اقداماتو کې له امریکا سره همکاري کوي یا برخه اخلي.
#ایران #امریکا #لارک_ټاپو #اردن #د_هرمز_تنګی #فارس_خلیج #د_ایران_بهرنیو_چارو_وزارت #سیمه ایز_تنګاوی #سفیر_ټی وی
