د مصر په جیزه ولایت کې د دوو مسافر وړونکو اورګاډو د ټکر له امله لږ تر لږه ۴ تنه مړه شوي او ۸۸ نور ټپیان دي.
دا پېښه د یکشنبې په ورځ د «العیاط» په سیمه کې شوې ده. د مصر د اورګاډو شرکت د معلوماتو له مخې، یو اورګاډی چې له جیزې څخه د فیوم پر لور روان و، د بل اورګاډي له شا سره ټکر کړی، چې له قاهرې څخه د اسوان پر لور روان و. د پېښې له امله د اورګاډي څو واګونونه له پټلۍ څخه وتلي دي.
د مصر د روغتیا وزارت ویلي، چې د پېښې ځای ته یې د ټپیانو د لېږد او درملنې لپاره ۷۲ امبولانسونه لېږلي دي.
د مصر ولسمشر عبدالفتاح السیسي د قربانیانو له کورنیو سره خواخوږي څرګنده کړې او د پېښې د لاملونو د بېړنۍ څېړنې او د غفلت د ثابتېدو په صورت کې یې د مسوولو کسانو د حساب ورکولو امر کړی دی.
د ژغورنې او مرستندویه ډلې لا هم د اورګاډو د پاتې شونو په پاکولو او د اورګاډي د تګ راتګ د خدمتونو د بېرته پیلولو لپاره هڅې کوي.
