د روسیې دفاع وزارت اعلان کړی چې د تېرې شپې پر مهال د دغه هېواد ځواکونو د اوکراین په پلازمېنه کییف او اودیسا سیمه کې د پوځي ـ صنعتي مجتمع پر فابریکو، مخابراتي مرکزونو او لوژستیکي تأسیساتو پراخ بریدونه کړي دي.
د دغه وزارت په وینا، په کییف کې دوه مخابراتي مرکزونه، چې «کییفسټار» او «پارکووي» هم پکې شامل دي، په نښه شوي دي؛ مسکو ادعا کوي چې دغو مرکزونو د اوکراین وسلهوالو ځواکونو لپاره مخابراتي خدمتونه او محاسبوي ظرفیتونه برابرول.
د روسیې دفاع وزارت همداراز ویلي چې په کییف کې د بېپیلوټه الوتکو د پرزو د تولید یوه فابریکه، د بېپیلوټه الوتکو د تولید یو مرکز، د «هورنېټ» بېپیلوټه الوتکو د تولید او ساتنې مرکز او یو ترانسپورتي او لوژستیکي مرکز په نښه شوي دي.
د روسیې د معلوماتو له مخې، په اودیسا سیمه کې هم دوه لوژستیکي مرکزونه او یوه باروړونکې بېړۍ، چې د تیلو او غوړونکو موادو د لېږد لپاره د چورنومورسک بندر ته کارول کېږي، په نښه شوي دي.
