د بلخ د عامې روغتیا ریاست ویاند کمال ځدراڼ ویلي، چې د دغه ولایت د دهدادي ولسوالۍ د شیرآباد روغتیايي مرکز ته ۵۷ قلمه طبي وسایل سپارل شوي دي.
دغه وسایل په لومړۍ بسته کې، چې ټولیز ارزښت یې ۱۱۱ زره امریکايي ډالره دی، د عامې روغتیا وزارت په همکارۍ او د UNHCR ادارې په مالي ملاتړ برابر او یاد روغتیايي مرکز ته سپارل شوي دي.
د بلخ د عامې روغتیا ریاست په وینا، د وسایلو دویمه بسته به هم په راتلونکي پړاو کې د شیرآباد روغتیايي مرکز ته وسپارل شي.
دغه وسایل د عامې روغتیا وزارت د پروګرامونو او پلان جوړونې د رییس ډاکټر عبدالستار صحت په مشرۍ د یوه تخنیکي پلاوي له لوري او د UNHCR ادارې د استازو په شتون کې اړوند روغتیايي مرکز ته سپارل شوي دي.
