په تېره یوه میاشت کې په بلخ ولایت کې ۵۱۴۰ اړمنو راستنیدونکو او کوربه کورنیو ته د مرستو ویش

د بلخ ولایت د کډوالو او راستنیدونکو چارو ریاست اعلان وکړ چې په تېره یوه میاشت کې، د مرستندویه ادارو په همکارۍ، ۵۱۴۰ اړمنو راستنیدونکو او کوربه کورنیو ته نغدي، خوراکي او غیر خوراکي مرستې ویشل شوي دي.

په دې مرستو کې نغدي کڅوړې، اساسي خوراکي توکي (اوړه، غوړي، وريجې، او نور) او غیر خوراکي توکي (کمپلونه، جامې، د حفظ الصحې توکي او نور) شامل دي او د ګاونډیو هیوادونو څخه راستنیدونکو کورنیو سره د ملاتړ او په کوربه ټولنو باندې د فشار کمولو په هدف ترسره شوي دي.

د کډوالو چارو ریاست ټینګار وکړ چې دا ویشونه په هدفمند، شفاف او لومړیتوب لرونکي ډول د زیان منونکو کورنیو لپاره ترسره شوي او د اسلامي امارت د ملاتړ پروګرامونو یوه برخه ده ترڅو د رضاکارانه راستنیدنې او ټولنې ته د کډوالو د بیا یوځای کیدو پروسه اسانه کړي.