څو ساعته وروسته له هغه چې د امریکا ولسمشر ډونالډ ټرمپ له کاناډا او مکسیکو څخه په وارد شویو توکو باندې ۲۵٪ تعرفې ولګولې، د امریکا دواړو ګاونډیو هیوادونو د غچ اخیستنې پلانونه اعلان کړل.
د ټرمپ لخوا هیواد ته په وارد شویو توکو باندې د ۲۵٪ تعرفې لګولو په ځواب کې، د کاناډا لومړي وزیر جسټین ټروډو اعلان وکړ چې د کاناډا حکومت به هم په امریکایي توکو ۲۵٪ تعرفه ولګوي.
هغه په یوه مطبوعاتي کنفرانس کې وویل چې په لومړي ګام کې به د امریکا پر ۳۰ میلیارده ډالرو وارداتي توکو ۲۵ سلنه تعرفه ولګول شي او بیا به دا تعرفې له امریکا څخه ۱۲۵ میلیارده ډالرو وارداتو ته وغځول شي.
په ورته وخت کې، د مکسیکو ولسمشرې کلاډیا شینباوم وویل چې هیواد به یې غچ اخیستونکي اقدامات وکړي.
هغه په ټولنیزه شبکه ایکس کې ولیکل: “ما د اقتصاد وزیر ته امر وکړ چې هغه پلان پلي کړي چې موږ پرې کار کوو؛ “په دې پلان کې تعرفې او د مکسیکو د ګټو د دفاع لپاره نور اقدامات شامل دي.”
