د کابل یو شمېر اوسېدونکو د دوشنبې په ورځ (۲۱ تله ۱۴۰۴) په یوه احتجاجي غونډه کې د پاکستان له خوا د هېواد پر خاوره وروستي بریدونه په کلکه وغندل، چې په کې د کابل د هوايي حریم سرغړونه او د تېرې پنجشنبې په شپه د پکتیکا ولایت د برمل ولسوالۍ د چرګانو په بازار کې هوايي برید شامل وو.
لاریون کوونکو خبرداری ورکړ چې افغان ولس به زور ته سر نه ټیټوي او د هر ډول یرغل په وړاندې به په متحد ډول د خپل هېواد له خپلواکۍ او ځمکنۍ بشپړتیا څخه دفاع وکړي.
د دې بریدونو په ځواب کې، د اسلامي امارت ځواکونو تېره شنبه شپه په کندهار، هلمند، زابل، ننګرهار، پکتیا، پکتیکا او خوست ولایتونو کې د فرضي ډیورنډ کرښې په اوږدو کې د پاکستاني ځواکونو پر پوستو غچ اخیستونکي بریدونه وکړل.
د افغانستان د شیعه علماوو شورا مرستیال محمد اکبري په غونډه کې وویل چې افغان ولس په سیمه کې سوله او سوکالي غواړي او د هېواد پالیسي له ګاونډیو سره د دوستانه اړیکو په جوړولو ولاړه ده.
دې غونډې د ملي حاکمیت د دفاع او د بهرنیو ګواښونو په وړاندې د یووالي ساتلو لپاره د افغانانو کلک هوډ څرګند کړ.
