په کابل کې د قطر سفارت اعلان وکړ چې پرون یې د نړیوالې ټولنې سره د افغانستان د اړیکو د راتلونکي او د دې اړیکو د پیاوړتیا د لارو چارو په اړه د ګردي میز بحث کوربه توب وکړ.
د سفارت د بیان له مخې، په افغانستان کې د ملګرو ملتونو د مرستندویه پلاوي (یوناما) سرپرستې مشرې او د سیاسي چارو لپاره د ملګرو ملتونو د سرمنشي ځانګړې مرستیالې جورجټ ګګنون د سکاټ سمیت سره یوځای په غونډه کې ګډون وکړ.
ذاکر جلالي او عبدالحی قانت هم د افغانستان له لوري په خبرو اترو کې برخه واخیسته.
د قطر د سفارت په وینا، د غونډې اصلي تمرکز د نړیوالې ټولنې سره د افغانستان د اړیکو د راتلونکي بیاکتنه او د دې اړیکو د ملاتړ او پیاوړتیا لپاره د حل لارو لټول وو.
ګډونوالو د دوامداره رغنده خبرو اترو، د متقابلې همکارۍ پراخولو او د افغانستان او نړیوالې ټولنې ترمنځ د پراخو تعاملاتو د فرصتونو د برابرولو پر اهمیت ټینګار وکړ.
#افغانستان #قطر #کابل #یوناما #نړیوالې_اړیکې #متحده_ملتونه #ډیپلوماسي
