په مسکو کې د اسلامي امارت د افغانستان سفیر، مولوي ګلحسن حسن، د «د خبرو اترو، دودونو او د شمالي قفقاز د پراختیا لپاره فضا» په نوم نړیوال فورم کې ګډون او وینا وکړه.
هغه په خپله وینا کې د متقابل درناوي، خبرو اترو، اقتصادي همکاریو او د افغانستان او د سیمې د هېوادونو ترمنځ پر ګډې پراختیا ټینګار وکړ.
د افغانستان سفیر د دغه فورم په څنډه کې د روسیې د ستاوروپول سیمې د اقتصادي پراختیا له وزیر، انتون بوریسوویچ دورونین، سره وکتل او د سوداګرۍ، پانګونې او اقتصادي همکاریو د پراختیا په اړه یې خبرې وکړې.
مولوي ګلحسن حسن له یو شمېر افغان سوداګرو او په روسیه کې د افغان ټولنې له استازو سره هم لیدلي، د هغوی ستونزې او وړاندیزونه یې اورېدلي او د سفارت پر هر اړخیزې همکارۍ یې ټینګار کړی دی.
