د مغزي سکتې نړیواله ورځ هر کال د اکتوبر په ۲۹مه نمانځل کېږي، څو د خطر له عواملو، خبرداری ورکوونکو نښو، د مخنیوي لارو او پر وخت درملنې په اړه د خلکو عامه پوهاوی زیات شي.
د مغزي سکتې نړیوال سازمان دغه ورځ په ۲۰۰۶ میلادي کال کې رامنځته کړه او په ۲۰۱۰ میلادي کال کې یې مغزي سکته د عامې روغتیا په برخه کې بېړنی حالت اعلان کړ.
مغزي سکته هغه مهال رامنځته کېږي چې د وینې د رګ د بندېدو یا چاودېدو له امله د مغز یوې برخې ته د وینې جریان ګډوډ شي. پر وخت تشخیص او بېړنیو روغتیايي خدمتونو ته لاسرسی د مغز د زیان په کمولو او د ناروغ د ژوند په ژغورلو کې حیاتي رول لري.
د مغزي سکتې له مهمو خبرداری ورکوونکو نښو څخه ناڅاپه د تعادل له لاسه ورکول، د لید ستونزې، د مخ د یوې خوا کږېدل، د لاس کمزوري یا بېحسي او په خبرو کولو کې ستونزه دي. د دغو نښو د لیدلو په صورت کې باید سمدستي له بېړنیو روغتیايي خدمتونو سره اړیکه ونیول شي، ان که نښې تر لنډ وخت وروسته بېرته هم له منځه ولاړې شي.
د وینې لوړ فشار، شکر، د وینې د کولسټرول لوړه کچه، د زړه ناروغۍ، د تنباکو کارول، ناسالم خواړه او د فزیکي فعالیت کموالی د مغزي سکتې د خطر له مهمو عواملو څخه ګڼل کېږي. لوړ عمر او په کورنۍ کې د دې ناروغۍ مخینه هم د مغزي سکتې د رامنځته کېدو خطر زیاتولی شي.
متخصصان د وینې فشار او د وینې د شکرې د کچې پر کنټرول، د سالم خوراکي رژیم پر رعایت، منظم فزیکي فعالیت، د تنباکو پر پرېښودو او د بنسټیزو ناروغیو د درملنې پر دوام ټینګار کوي. دغه اقدامات د مغزي سکتې د رامنځته کېدو خطر راکمولی شي.
