د اسلامي امارت د کورنیو چارو وزارت اعلان کړی چې په هرات ښار کې سلګونه امنیتي کمرې فعالې شوې او د دغه ښار د پام وړ برخې په پرمختللو امنیتي څارنیزو سیستمونو سمبالې شوې دي.
د دغه وزارت مسوولان وايي، د دې سیستم فعالول د خلکو د اړتیا او غوښتنې پر بنسټ ترسره شوي او له امنیتي منسوبینو او ښاریانو څخه یې غوښتي چې د دغو تجهیزاتو په ساتنه او اغېزمنه کارونه کې همکاري وکړي.
د هرات امنیه قوماندان ویلي چې د دغو کمرهګانو نصب د امنیت د پیاوړتیا، د جرمونو د مخنیوي او د جرمي پېښو د پېژندنې او تعقیب د اسانتیا په موخه ترسره شوی دی.
د مسوولانو په وینا، د هرات ښار په نورو برخو او د دغه ولایت په ولسوالیو کې د امنیتي کمرهګانو د نصب او فعالولو بهیر به هم دوام وکړي.
