د ملګرو ملتونو سرمنشي انتونیو ګوتریش د سې شنبې په سهار د غزې په اړه د امریکا لخوا وړاندیز شوي پریکړه لیک تصویب ته هرکلی وکړ او دا یې “د اوربند ټینګولو په لور یو مهم ګام” وباله.
ګوتریش، چې په تیرو دوو کلونو کې یې په غزه کې د بشري وضعیت په اړه په مکرر ډول اندیښنه څرګنده کړې، دا پریکړه لیک د تاوتریخوالي کمولو په لور یو ګام وباله، پداسې حال کې چې چین او روسیې په کلکه د پریکړې نیوکه وکړه.
په ملګرو ملتونو کې د چین دایمي استازي، فو کانګ، “ژوره اندیښنه” څرګنده کړه چې پریکړه لیک “د فلسطین د حاکمیت او ملکیت حقونه په بشپړ ډول په پام کې نه نیسي.”
له بلې خوا، د روسیې دایمي استازي، واسیلي نیبنزیا، د خپل هیواد د نه ګډون په اړه وضاحت ورکړ او ویې ویل چې د پریکړه لیک متن د دوه دولتونو د حل لارې په اړه د ملګرو ملتونو د عمومي اسمبلۍ د اعلامیې سره په ټکر کې دی.
دا د یادونې وړ ده چې د پریکړه لیک دقیق جزئیات لا تر اوسه په رسمي ډول نه دي اعلان شوي.
