په ملګرو ملتونو کې د ایران سفیر او سرپرست استازي، غلامحسین درزي، د دغه سازمان سرمنشي او د امنیت شورا رئیس ته په یوه لیک کې د ایران پر ضد د «ټولو بمونو مور» په نوم د بم کارولو په اړه د امریکا ګواښونه غندلي او د کړکېچ د زیاتېدو د مخنیوي لپاره یې د بېړني اقدام غوښتنه کړې ده.
په دغه لیک کې د امریکايي رسنیو هغو راپورونو ته اشاره شوې چې د احتمالي پوځي انتخابونو، په ځانګړي ډول د «MOAB» بم د کارولو، د ارزونې په اړه خپاره شوي دي. همداراز، د ایران د انرژۍ پر تاسیساتو د برید په اړه د اسرائیلو د جګړې وزیر څرګندونې هم په لیک کې یادې شوې دي.
ایران خبرداری ورکړی چې د ملکي وګړو پر حیاتي بنسټونو د برید ګواښونه د بشري او چاپېریالي ناورینونو جدي پایلې لرلای شي او له نړیوال بشردوستانه حقوقو سره په ټکر کې دي.
درزي د ملګرو ملتونو د امنیت شورا څخه غوښتنه کړې چې د ایران پر ضد پوځي ګواښونه وغندي، د اړتیا په صورت کې بېړنۍ غونډه جوړه کړي او د مسوولو لورو د حساب ورکولو او د اوښتو زیانونو د جبران لپاره اقدام وکړي.
ایران د لیک په پای کې د ملګرو ملتونو د منشور د ۵۱مې مادې پر بنسټ له خپل ځانه د دفاع پر حق ټینګار کړی او خبرداری یې ورکړی چې هر ډول نور تېری کولای شي د کړکېچونو د بېمهاره زیاتېدو لامل شي.
