په سیمه کې د کړکېچونو له زیاتېدو او په لوېدیځه اسیا کې د امریکا د استازولیو له لوري د امنیتي خبرداریو له خپرېدو سره هممهاله، د «سيانان» د ملي امنیت یوه شنونکي ویلي چې ډونالډ ټرمپ په کمپ ډېوېډ کې په یوه غونډه کې پر یمن د احتمالي بریدونو انتخابونه ارزولي دي.
د «سيانان» د ملي امنیت شنونکي الکس پلیتساس په اېکس کې لیکلي چې په کمپ ډېوېډ کې د ټرمپ غونډه پر یمن د بریدونو د انتخابونو د ارزونې او بحث لپاره جوړه شوې وه او په سیمه کې د امریکا په سفارتونو کې د امنیتي خبرداریو له خپرېدو وروسته، د امریکا ولسمشر تر ټاکلي وخت مخکې سپینې ماڼۍ ته ستون شوی دی؛ خو دا ادعا لا تر اوسه سپینې ماڼۍ په رسمي ډول نه ده تایید کړې.
راپورونه ښيي چې په سیمه کې د امریکا یو شمېر استازولیو د کړکېچونو د زیاتېدو او د غچ اخیستونکو بریدونو د خطر په اړه خبرداری ورکړی دی؛ د امریکا د بهرنیو چارو وزارت هم په وروستیو ورځو کې په سیمه کې د امنیتي خبرداریو کچه لوړه کړې ده.
دا بدلونونه په داسې حال کې رامنځته کېږي چې په وروستیو اوونیو کې د سعودي عربستان او په یمن کې د حوثي ځواکونو ترمنځ جګړه شدیده شوې او د سعودي عربستان پر ځینو موخو د توغندیزو او بېپیلوټه الوتکو د بریدونو راپورونه ورکړل شوي دي.
رویټرز هم راپور ورکړی چې واشنګټن تر اوسه د حوثیانو پر ضد له مستقیمې پوځي مداخلې ډډه کړې او د سعودي عربستان پر استخباراتي او امنیتي ملاتړ یې تمرکز کړی دی.
تر دې مخکې، داسې راپورونه خپاره شوي وو چې سعودي عربستان له امریکا څخه د حوثیانو پر ضد د پوځي اقدام غوښتنه کړې وه؛ خو امریکايي چارواکو ویلي وو چې د ټرمپ حکومت په هغه وخت کې پر حوثیانو د مستقیم برید کوم پلان نه درلود.
که د امریکا برید عملي شي، په سیمه کې د جګړې د پراخېدو او په لوېدیځه اسیا کې د امریکايي ځواکونو او تأسیساتو پر وړاندې د ګواښونو د زیاتېدو احتمال مطرح شوی دی؛ خو تر اوسه واشنګټن د برید د پیلولو په اړه د خپلې وروستۍ پرېکړې په تړاو کوم باوري او رسمي راپور نه دی خپور کړی.
