عراقي کاروونکو هغه انځورونه خپاره کړي چې د امریکا یو پوځي کاروان پکې لیدل کېږي او د دوی په وینا، له عراق څخه د اردن پر لور پوځي تجهیزات لېږدوي.
عراقي سرچینې وايي، له عراق څخه د امریکايي ځواکونو د وتلو نېټې ته په نږدې کېدو سره، د دغه هېواد د پوځي تجهیزاتو د لېږد بهیر هم پیل شوی دی. د جمعې په سهار (۲۷ سنبله ۱۴۰۵) هم راپورونه خپاره شول چې څو موټرې، چې درانه پوځي تجهیزات یې لېږدول، له کردستان سیمې څخه د انبار ولایت پر لور او له هغه ځایه د اردن پولې ته روانې شوې دي.
د عراق د کردستان سیمې د کورنیو چارو وزیر ریبر احمد تر دې وړاندې ویلي و چې د امریکا په مشرۍ د نړیوال ائتلاف ځواکونه له کردستان سیمې څخه د وتلو بهیر پیل کړی دی.
د بغداد او واشنګټن د هوکړې له مخې، امریکايي ځواکونه باید د سپټمبر تر ۳۰مې په عراق کې خپل پوځي حضور پای ته ورسوي.
