خپاره شوي انځورونه د یوه امریکايي پیلوټ د ژغورنې عملیاتو جزئیات ښيي، چې د دغه هېواد د F-15E جنګي الوتکې له نسکورېدو وروسته، د الوتکې د ایجکټ سیسټم په وسیله ترې وتلی و.
د «براوو» په مستعار نوم یاد شوي دغه پیلوټ ویلي، چې له ایجکټ کېدو او ځمکې سره له لګېدو وروسته یې د ملا، مټ او اوږې برخې ټپي شوې او شاوخوا ۴۸ ساعته یې په یوه غرنیزه سیمه کې، چې له ډبرو سره محاصره وه، پټ تېر کړل.
د خپرو شویو راپورونو له مخې، د دغو دوو پیلوټانو د ژغورنې په عملیاتو کې ګڼ شمېر امریکايي جنګي الوتکو، بېپیلوټه الوتکو او ځانګړو ځواکونو برخه اخیستې وه.
همدارنګه راپور ورکړل شوی چې د عملیاتو پر مهال څو ترانسپورتي الوتکې او چورلکې، چې د بېړنۍ ناستې په ځای کې بندې پاتې شوې وې، د امریکايي ځواکونو له خوا ویجاړې شوې.
په پای کې دواړه پیلوټان ژوندي له ایران څخه ووتل او دغه عملیات، سره له دې چې درانه تجهیزاتي زیانونه یې لرل، د امریکايي ځواکونو له ډلې د ځاني مرګژوبلې پرته پای ته ورسېدل.
