د اسراییل هایوم ورځپاڼې راپور ورکړی چې موساد د ایران پر وړاندې د رواني، سایبري او معلوماتو د نفوذ عملیاتو د ترسره کولو په هدف یوه نوې څانګه جوړه کړې ده.
د راپور له مخې، دا څانګه په ۲۰۲۱ کال کې د ډیویډ بارنیا په نوښت جوړه شوه او تمرکز یې له دودیزو عملیاتو څخه سایبري فعالیتونو، رواني جګړې او د عامه افکارو اغیزمن کولو ته بدل شوی دی.
راپور ادعا کوي چې دا څانګه د زرګونو ټولنیزو رسنیو حسابونو شبکه کاروي ترڅو مواد خپاره کړي او سایبري فضا اغیزمنه کړي.
اسرایل هایوم دا هم ادعا کوي چې په دې څانګه کې د اعلاناتو متخصصین او د ټولنیزو رسنیو شنونکي په ایراني ټولنه کې د ټولنیزو رجحاناتو او نارضایتۍ څارنه او تحلیل کوي.
د ورځپاڼې په وینا، د دې پروګرام اوږدمهاله هدف په ایران کې د داخلي فشار رامینځته کول او په سیاسي پرمختګونو اغیزه کول دي.
ایراني او اسراییلي چارواکو تر اوسه په رسمي ډول د دې راپور جزیاتو ته ځواب نه دی ویلی.
