په کندهار ولایت کې امنیتي ځواکونو دوه کسان د دوو نجونو د تښتولو او د ډیورنډ کرښې له هاخوا افغانستان ته د لیږدولو په تور نیولي دي.
د کندهار د امنیه قوماندانۍ ویاند ملا اسدالله جمشید وویل چې دغه کسان تېره شپه د کندهار ښار په نهمه ناحیه کې د ځانګړو عملیاتو په ترڅ کې نیول شوي دي.
د هغه په وینا، د لومړنیو معلوماتو پر بنسټ، شکمنو کسانو نجونې د ډیورنډ کرښې بلې غاړې ته د مسلم باغ سیمې څخه تښتولې او افغانستان ته یې لیږدولې دي.
چارواکو زیاته کړه چې وروسته له هغه چې د قربانیانو کورنیو د سرحدي ځواکونو عمومي رییس مولوي حزب الله افغان سره اړیکه ونیوله، موضوع له امنیتي ادارو سره بحث شوه.
د پولیسو په وینا، عملیات پرون له غرمې وروسته د شپې تر ناوخته پورې دوام وکړ او په پایله کې، شکمن کسان د کندهار ښار د نهمې ناحیې د خاکریزوال ښوونځي په سیمه کې د تښتول شویو نجونو سره یوځای ونیول شول.
- دا هم ویل شوي چې تورن کسان د سپین بولدک ولسوالۍ محکمې ته وسپارل شول او تښتول شوې نجونې د محکمې له پریکړې وروسته د هغوی کورنیو ته وسپارل شوې.
