د ایران د سمندري ځواکونو قوماندان شهرام ایراني اعلان وکړ چې ډېر ژر به یوه نوې وسله معرفي شي چې د هغه په وینا “په دښمنانو کې به ویره واچوي”.
هغه دا هم وویل چې دښمن فکر کاوه چې د ایران پر وړاندې جګړه به په لنډ وخت کې پای ته ورسیږي، خو دا نظر اوس د هغه په وینا “په پوځي پوهنتونونو کې یوه ټوکه” ګرځېدلې ده.
د سمندري ځواکونو د قوماندان په وینا، د جګړې په جریان کې، دښمن د سمندر له لارې ایران ته نږدې شو او په سمندري ځواکونو کې یې د توغندیو لانچرونه وکارول.
هغه زیاته کړه چې د ایران سمندري ځواکونو د ابراهیم لینکن کښتۍ په وړاندې څو توغندیز عملیات ترسره کړل، چې د امریکا هوايي عملیات یې ګډوډ کړل.
ایراني دا هم ادعا وکړه چې متحده ایالات اړ شوي چې ترمیمونه ترسره کړي او په سیمه کې پوځي تجهیزات زیات کړي.
هغه ټینګار وکړ چې د هرمز تنګی د عربي سمندر له غاړې څخه تړل شوی او که مخالف ځواکونه نږدې شي نو پوځي اقدام به وشي.
د سمندري ځواکونو قوماندان په پای کې وویل چې د هیواد ځواکونه به د “د وینې وروستۍ څاڅکي” پورې دښمنانو ته د ځواب ویلو لپاره ټینګ ولاړ وي.
