په دوحه کې د افغانستان د اسلامي امارت سفیر محمد سهیل شاهین د قطر د ښاروالۍ له وزیر عبدالله بن حمد بن عبدالله العطیه سره وکتل او خبرې اترې یې وکړې.
په قطر کې د افغانستان د سفارت په وینا، په دې غونډه کې دواړو خواوو د کابل او دوحه د ښاروالۍ ترمنځ د ګډې همکارۍ د پراخولو په اړه بحث وکړ.
په مهمو موضوعاتو کې د سړکونو جوړول او ترمیم، د هوايي او ځمکني پلونو جوړول، د ښاري سکتور د کارمندانو لپاره د ظرفیت لوړولو پروګرامونه، او د ښاري زیربناوو پراختیا پورې اړوند نور مسایل شامل وو.
دا غونډه د دوه اړخیزو اړیکو د پیاوړتیا او د ښاري مدیریت او زیربنایي پروژو په برخه کې د قطر د بریالۍ تجربو د افغانستان ته د لیږدولو لپاره ترسره شوه.
