د افغانستان د اسلامي امارت ویاند ذبیح الله مجاهد په ایکس کې یوه اعلامیه خپره کړه، چې په کې د خوست، کونړ او پکتیکا ولایتونو باندې د پاکستاني ځواکونو د تېرې شپې هوايي بریدونه په کلکه غندل شوي او هغه یې “د افغانستان د هوايي حریم ښکاره سرغړونه” او د ټولو منل شویو نړیوالو اصولو خلاف بللي دي.
په اعلامیه کې راغلي چې دا “جرمونه” د غلطو معلوماتو پر بنسټ ترسره شوي او د پاکستان د پوځي رژیم لپاره به له شرم او ناکامۍ پرته بل څه نه وي.
د اسلامي امارت ویاند ټینګار وکړ: د افغانستان د هوايي حریم، ځمکې او خلکو دفاع یو دیني او قانوني حق دی، او په مناسب وخت او ځای کې به د یرغلګر ته اړین ځواب ورکړل شي.
د کابل څخه دا رسمي غبرګون وروسته له هغه خپور شو چې د خوست په ګربز ولسوالۍ کې د پاکستان په هوايي برید کې نهه ماشومان او یوه ښځه شهیدان او څو نور ملکي وګړي ټپیان شول.
ښاغلي مجاهد له نړیوالې ټولنې څخه وغوښتل چې دا یرغل وغندي.
