د کډوالو د حل عالي کمیسیون اعلان وکړ چې پرون (۲۹ لړم ۱۴۰۴)، ۱۰۴۰۵ افغان کډوال چې ۱۷۶۳ کورنۍ دي، له ایران او پاکستان څخه په زوره هیواد ته راستانه شوي دي.
د اسلامي امارت مرستیال ویاند ملا حمدالله فطرت د خپلې ورځپاڼې په لسمه پاڼه کې د دې کمیسیون د کمیټو ورځنی راپور خپور کړ او لیکلي یې دي چې دا کډوال د اسلام کلا (هرات)، پل ابریشم (نیمروز)، سپین بولدک (کندهار)، بهرام چه (هلمند) او تورخم (ننګرهار) بندرونو له لارې هیواد ته داخل شوي دي.
د هغه په وینا، په همدې ورځ ۱۳۳۰۳ کسان (۲۲۲۲ کورنۍ) خپلو اصلي سیمو ته لیږدول شوي، ۱۵۳۴ کورنیو سره مرسته وشوه، او ۱۵۷۷ مخابراتي سیم کارتونه د راستنیدونکو ترمنځ وویشل شول.
دا په داسې حال کې ده چې د دوشنبې په ورځ ۷،۳۲۶ افغان کډوال له ایران او پاکستان څخه په زوره ایستل شوي دي.
