د اسلامي امارت ویاند: د بګرام اډه نه په امریکا پورې اړه لري او نه هم چین پورې؛ دا د افغانستان د خاورې یوه برخه ده
د اسلامي امارت ویاند ذبیح الله مجاهد د العربیه شبکې سره په یوه مرکه کې د بګرام هوايي اډې د بیرته نیولو په اړه د امریکا د ولسمشر ډونالډ ټرمپ څرګندونې رد کړې او ټینګار یې وکړ چې دا اډه نه په امریکا پورې اړه لري او نه هم چین پورې، بلکې د افغانستان د خاورې یوه نه جلا کېدونکې برخه ده.
ښاغلي مجاهد امریکا ته په خطاب کې وویل چې امریکا باید له افغانانو سره په منطقي او ډیپلوماټیک ډول چلند وکړي، او زیاته یې کړه: “افغانستان غواړي له چین او امریکا دواړو سره اړیکې ولري او متوازن او اقتصادي پلوه بهرنۍ پالیسي تعقیبوي.”
هغه خبرداری ورکړ چې د افغانستان خلک به هیڅکله په خپله خاوره کې د بهرنیو ځواکونو شتون ونه مني او د هیواد خاوره د خبرو اترو یا بهرني کنټرول تابع نه ده.
دا غبرګون په داسې وخت کې راځي چې ټرمپ مخکې ادعا کړې وه چې چین د بګرام اډه نیولې او متحده ایالات دې ته اړتیا لري ترڅو چین وڅاري او نادره معدني موادو ته لاسرسی ولري.
اسلامي امارت دا ادعاوې دروغ بللي او پر خپل بشپړ حاکمیت یې ټینګار کړی دی.
