د افغانستان د اسلامي امارت ویاند ذبیح الله مجاهد د شنبې په ورځ (د وږی ۸مه ۱۴۰۴) د جاپان له یوې رسنۍ سره په مرکه کې وویل چې افغان حکومت له امریکا سره قوي او مثبتې اړیکې غواړي.
هغه له واشنګټن څخه وغوښتل چې د اسلامي امارت په وړاندې خپلې “سختې” پالیسۍ بیاکتنه وکړي، او په ځانګړې توګه په بهرنیو بانکونو کې د افغانستان کنګل شوې شتمنۍ خوشې کړي.
د افغانستان د مرکزي بانک شاوخوا ۷ ملیارد ډالرو شتمنیو ته په اشارې سره چې له ۲۰۲۱ کال راهیسې د متحده ایالاتو لخوا کنګل شوې دي، مجاهد ټینګار وکړ چې د دې سرچینو خوشې کول کولی شي د هیواد اقتصادي وضعیت ښه کولو او دوه اړخیزو اړیکو پیاوړتیا کې مرسته وکړي.
هغه د نجونو د زده کړې بندیز هم “داخلي مسله” وبلله او زیاته یې کړه: “افغانستان خپل کلتور او ارزښتونه لري، او موږ له نړیوالې ټولنې څخه غواړو چې په دې چارو کې مداخله ونه کړي.”
تر اوسه پورې، امریکایي چارواکو په رسمي ډول د دې څرګندونو په اړه غبرګون نه دی ښودلی، خو مخکې یې ویلي وو چې د اسلامي امارت سره هر ډول تعامل د نړیوالو مکلفیتونو سره د دوی د عمل پورې اړه لري.
