د خوست ولایت د پولیسو د قوماندانۍ د مخدره توکو پر وړاندې د مبارزې ریاست د چهارشنبې په ورځ (۲۹ زمرۍ ۱۴۰۴) ۱۳۰ اړمنو کورنیو ته د اوړو، غوړیو او نورو خامو موادو په ګډون د خوراکي توکو مرستې کڅوړې ووېشلې.
د باختر خبري اژانس د راپور له مخې، ۳۰ کورنیو اته قلمه خوراکي توکي او ۱۰۰ کورنیو دوه قلمه خام مواد ترلاسه کړل.
دا مرسته د اسلامي امارت د رهبر د ځانګړي فرمان له مخې په ټول هېواد کې د اړمنو کورنیو د ملاتړ لپاره ووېشل شوه.
د خوست سیمه ییزو چارواکو ویلي چې د دې اقدام موخه د معیشت ستونزې کمول او د زیان منونکو ډلو ملاتړ کول دي.
د هیواد په نورو برخو کې د داسې ملاتړ پروګرامونو د دوام لپاره هڅې روانې دي.
