د هرات د والي مطبوعاتي دفتر په یوه مطبوعاتي اعلامیه کې لیکلي چې د ټاپي پروژې عمومي رییس د بهرنیو چارو وزارت د مرستیال استازي په شتون کې د هرات له والي مولانا اسلام جار سره وکتل او د پایپ لاین د غځولو د پروسې د چټکتیا اعلان یې وکړ.
د مطبوعاتي اعلامیې له مخې، د ټاپي پروژې عمومي رییس ښاغلي امانوف د هرات والي مولانا اسلام جار سره په یوه کتنه کې د ټاپي پروژې د پرمختګ په اړه لنډ راپور شریک کړ او اعلان یې وکړ چې د ګازو د غځولو کار د پایپ لاین کار په چټکۍ سره روان دی او تر اوسه پورې درې کیلومتره پایپ لاین غځول شوی دی.
له بلې خوا، مولانا اسلام جار د دې پروژې د کار د پرمختګ په برخه کې د ټاپي پروژې د چارواکو د هڅو هرکلی وکړ او د ټاپي عمومي رییس ته یې د کار د چټک پرمختګ لپاره د اړینو اسانتیاوو په برابرولو کې د سیمه ییزې ادارې د بشپړې همکارۍ ډاډ ورکړ.
