د ځمکو د غصب د مخنیوي کمیسیون د کابل ښار د لسمې ناحیې اړوند د شیرپور په سیمه کې تر ۱۵۵ جریبه زیاته ځمکه د دولتي ملکیتونو په توګه پیژندلې او د دې سیمې اوسیدونکو ته یې د ایستلو امر صادر کړی دی.
د عدلیې وزارت ویاند برکت الله رسولي وايي، دغه ځمکه له ختیځ څخه د وزیر اکبر خان د شپږمې، پنځلسمې او ۱۶مې سړک، له لوېدیځ څخه د کوچې قصابي شهرانو او له شمال څخه تر وزیر اکبر خان پورې غځېدلې ده. د شهید څلورلارې او له سویل څخه تر شیرعلي خان سړک پورې تړلې ده، چې د کابل ښاروالۍ او د ځمکو د غصب د مخنیوي کمیسیون له خوا له هر اړخیزو څیړنو وروسته د دولتي ملکیت په توګه تاسیس شوې ده.
