نور احمد اغا د مرکزي بانک سرپرست د ملګرو ملتونو د سرمنشي له ځانګړې استازې روزا اوتونبایوا سره په لیدنه کې د مالي خدمتونو د پراختیا په اړه خبرې کړې دي.
مرکزي بانک په یوه خبرپاڼه کې ویلي، چې په دې کتنه کې نور احمد اغا د هېواد په ټولو برخو کې د مالي خدمتونو د پراختیا پر اهمیت ټینګار وکړ او دا یې د هېواد د اقتصادي وضعیت د ښه کېدو یو مهم عامل وباله.
د خبرپاڼې د معلوماتو پر بنسټ، نور احمد اغا زیاته کړه، چې د افغانستان مرکزي بانک د کوچنیو پورونو د ورکړې لپاره مقرره جوړه کړې او د ده په وینا، دغه اقدام کولای شي په هېواد کې د مالي خدمتونو له پراخولو سره مرسته وکړي.
په خبرپاڼه کې راغلي چې په دې کتنه کې روزا اوتنبایوا د مالي خدمتونو د پراختیا او د اسلامي بانکدارۍ له مخکښو بنسټونو سره د اړیکو د ټینګولو په برخه کې د همکارۍ ژمنه وکړه او دغه سکتور یې د افغانستان د خلکو لپاره مهم وباله.
