د اسلامي امارت د مهاجرینو او راستنیدونکو چارو وزارت په دوو جلا جلا خبرپاڼو کې ویلي چې دغه افغان اتباع د پاکستان د پولیسو له خوا له دې امله نیول شوي چې د اوسیدو اسناد یې نه درلودل.
د دغه وزارت د خبرپاڼې له مخې، په دغو ۱۱ افغان اتباعو کې یو یې ماشوم دی، دوه یې دوه کاله او شپږ میاشتې د پاکستان په زندانونو کې تېرې کړې دي.
د يادونې وړ ده، چې د انترپول له خوا لس نور افغانان هم هېواد ته استول شوي دي.
دا په داسې حال کې ده، چې تر دې وړاندې پاکستاني چارواکو ویلي وو، چې دغه هېواد د ۸۰۰ زره نورو افغان کډوالو د «جبري شړلو» بهیر پیل کړی او که دغه کډوال په خپله خوښه له پاکستان ونه وځي، د پولیسو له خوا به ونیول شي.
باید وویل شي، چې د کډوالو په چارو کې د ملګرو ملتونو عالي کمیشنر فیلیپو گراندی هم د خپل درې ورځني سفر په ترڅ کې له پاکستاني چارواکو غوښتي، چې د افغان کډوالو د جبري ایستلو لړۍ ودروي.
خو د پاکستان د بهرنیو چارو وزارت ویاندې زهرا بلوچ بله ورځ وویل چې دا بهیر نه دی درېدلی او لا هم روان دی.
