د ملګرو ملتونو د ښځو څانګې راپور ورکړی، چې په ۱۱۳ هېوادونو کې هېڅ ښځینه مشره نشته او یوازې ۲۶ هېوادونو مشري ښځې کوي.
دې ادارې یو نوی راپور خپور کړی چې د مشرتابه، اجرایوی پوستونو او د وزارتونو په سر کې د ښځو شمېرې ښيي.
د ملګرو ملتونو ښځو اعلان کړی چې د نړۍ په کچه د اجرایوي تصمیم نیولو په ټولو کچو کې ښځې کمې استازیتوب کوي او دا چې په سیاسي ژوند کې د جنسیتی مساوات ترلاسه کول لاهم یو لرې هدف دی.
د دغه سازمان د شمېرو له مخې، ښځې د کابینی ۲۳،۳ سلنه غړي جوړوي او په ۲۰۲۴ کال کې د هغو ښځو شمېر چې د وزارتونو سرپرستي په غاړه لري، د ۲۰۲۳ کال په پرتله ۰،۵ سلنه کموالی راغلی دی.
دا هم ویل شوي چې ښځې په کورنیو او ماشومانو، ټولنیزو چارو او د کورنیو او اقلیمی چارو په برخو کې ډېرې فعالې دي، په داسې حال کې چې سیاسي برخې لکه اقتصادی، دفاع، عدالت او داخلي چارې لا هم د نارینه وو په واک کې دي.
