ملګرو ملتونو پرون خبرداری ورکړ چې د غزې په جنوبي برخه کې هیڅ خوندي سیمه نشته او هغه سیمې چې د اسراییلو لخوا د فلسطینیانو لپاره د “خوندي سیمو” په توګه ټاکل شوي په حقیقت کې “د مرګ ځایونه” دي.
په جینیوا کې په یوه کنفرانس کې د وینا پر مهال، د یونیسف ویاند جیمز ایلډر په غزه کې بشري وضعیت “ناورین” وباله او ویې ویل: “په جنوبي غزه کې د خوندي سیمې مفکوره مسخره ده.”
هغه زیاته کړه: “بمونه له اسمان څخه په ویرونکي ډول رالویږي، ښوونځي چې د لنډمهاله سرپناه په توګه ټاکل شوي په منظم ډول په کنډوالو بدلیږي، او خیمې په هوایی بریدونو کې سوځول کیږي.”
ایلډر ټینګار وکړ چې هغه فلسطینیان چې د غزې ښار د وتلو امر شوی دی هیڅ خوندي ځایونه نلري او روانې بمبارۍ د ملکي وګړو، په ځانګړې توګه د ماشومانو ژوند په خطر کې اچوي.
دا خبرداری په داسې حال کې راځي چې اسراییل په دې وروستیو کې د نتزاریم دهلیز کنټرول بشپړ کړ، چې سلګونه زره خلک یې سویل ته اړ کړل.
