د استونیا عامه خپرونې ERR راپور ورکړی چې د شمالي اتلانتیک تړون سازمان (ناټو) د استونیا په پارنو ښار کې د جرمني او هالنډ د ګډ پوځي کنډک د ځای پر ځای کولو امکان په پام کې نیسي.
د استونیا د دفاع وزیر هانو پوکور دا پلان د بالتیک په سیمه کې د خپل پوځي شتون د پیاوړتیا لپاره د ناټو د پراخ نوښت یوه برخه وبلله او دا یې د استونیا د دفاعي ځواکونو لپاره یو مهم او ستراتیژیک ګام وباله.
د راپور له مخې، کنډک به د پرمختللي قوماندې مرکز په توګه کار وکړي او له ۱۰۰ څخه تر ۲۰۰ پورې پرسونل به پکې شامل وي چې لوژستیکي، امنیتي او مدیریتي دندې به ترسره کړي.
دا اقدام په داسې حال کې کیږي چې په بالتیک سیمه کې تاوتریخوالی زیات شوی او استونیا له روسیې سره د خپلو پولو د پیاوړتیا لپاره څو ګامونه پورته کړي دي، په شمول د سرحدي بندرونو کې د خنډونو او فلزي دروازو نصب کول.
د روسیې د بهرنیو چارو وزارت ویاندې ماریا زاخارووا مخکې د بالتیک سیمې د پوځي کولو د یوې برخې په توګه د دې اقداماتو او د تالین د پوځي وړتیاوو زیاتوالی تشریح کړی و.
